#009
Ieri, no go scrito gnente parché ero stanco e gàvea tantissima pegrissia. E va ben cossita, parché go bisogno de trenar la mia flessibilità cognitiva ognitanto.
Gàvea dormisto abastansa, ma no tanto ben. Ero stanco. Son ndato a l’academia pi bonora e go fat un trenamento ràpido de esercìssii composti. Par sorte, l’academia la zera voda. Co ritornevo, go passà ntel supermercato par comprar na s-ciantina de polastro.
A le 2:30 gàvea un pranzo co i mei due orientadori. Á. el zera malà e stufo de star in casa, alora el me ga acompagnà fin al ristorante. Mi ero meso premoso, ma el me ga dito de proar a godérmela. I ze vegnesti anca J. e R. Gavemo magnà ben, se anca i cogi i zera massa pegro. Dopo pranzo, gavemo buo na reunion ntel scritòrio del me orientador. E par dir la verità, la ze andà tuto ben.
Co son rivà a casa, me go incorto che gàvea desmentegà de metar el polastro nte la geladera. Meno mal che el zera par magnar ntel stesso di. Anca per sora, a pena rivar a casa gàvea tanti gasi. Questo el ga durà tuta la note. Fursi el pranzo no me ga fat tanto ben…
Al fin dei conti, go finì lavorando fin tardi, e anca una s-cianta pi co go desmissià ntel meso dela note e no podevo pi dormir. Alora, ieri sera no so mia dormisto ben. Go anca desmentegà de tor la creatina ieri.
Co zero drìo preparar la colassion sta matina, go desmentegà de impissar el fogon e go perso tempo. Dopo colassion son ndato a l’academia a l’ora de sempre. Nantra volta go fat dei esercìssii composti. Seben che me mancava energia, go trenà pi o meno ben. Ntel supermercato go comprà patate e polpete par la sena de sta sera. Adesso vago a l’associassion par giugar giughi de tàola. Ntel tren lesarò «El Pìcolo Principe» in benasquese.